Fanatik Trump yo Anonse Yap Tounen Wachintonn ak Zam nan Prestasyon Sèman Joe Biden

Nan yon seri mesaj yo poste sou rezo sosyal yo, fanatik Donald Trump yo anonse yap retounen Wachintonn ak zam 20 janvye, jou prestasyon sèman prezidan Joe Biden nan, dapre sa nou li sou sitwèb NBC News. Menm moun sa yo te pran daso mèkredi pase Kapitòl la, lokal palman ameriken an, yon zak briganday ki te lakòz 5 moun pèdi lavi yo, ladan yo yon polisye ak 4 patizan prezidan Trump.

Fanatik Donald Trump yo pa dekouraje, yo sèmante 77 fwa 7 fwa Joe Biden pap monte sou pouvwa a menm si majorite pèp Ameriken an te vote pou li nan eleksyon 3 novanm 2020 an. Dapre mesaj moun sa yo pa sispann poste sou rezo sosyal yo, yap planifye plizyè aksyon pou anpeche ansyen visprezidan Obama a prete sèman jou 20 janvye 2021 an. 

Yo pa nan voye wòch kache men. Yo anonse byen klè zak yo pral fè yo. Youn nan zak sa yo se mache sou Wachintonn ak gwo zam jou prestasyon sèman an. Nan yon mesaj yo voye sou yon platfòm sosyal ki rele “Parler“, yo pale byen klè, yo di konsa: 

“Anpil nan nou ap tounen Wachintonn depi 19 janvye. Nap tounen ak zam nou. Nap vide sou kapital la tankou grenn lapli. Okenn lame ni fòs polis pap ka kanpe devan nou. Se pral yon bagay lemonn poko janm wè”. 

“Trump oubyen lagè. Bagay la senp”

“Si w pa konn tire, ou dwe aprann fè sa. KOUNYE A”.

“Nou pral anvayi bilding gouvènman yo, touye polisye, touye gad sekirite, touye anplwaye ak ajan federal, epi mande yon rekontaj”.

“20 janvye se pral dezyèm mitan match la. Fwa sa nap san pitye. Kit Trump ret sou pouvwa a kit li pa rete, sa pa gade n. Lagè n vle”.

Tout sa se bagay fanatik Trump yo ap poste sou Parler ki se rezo sosyal yo te itilize pou òganize briganday 6 janvye a nan Kapitòl e ki te lakòz 5 moun mouri. Se Donald Trump limenm menm ki te pase fanatik yo lòd pou mache sou palman an kote palmantè yo tap sètifye viktwa Joe Biden. Trump te di foul la mache pran yo.

Lòt aksyon moun sa yo – ke laprès deja rele teworis – ap planifye fè se atake lòt biwo Leta Ameriken ak zam e menm ak bonm. Jou mèkredi 6 janvye, lè yo te atake Kapitòl la, lapolis te dekouvri plizyè bonm nan antouray palman ameriken an. 

Lapolis ak FBI deja arete plizyè moun ki te patisipe nan briganday 6 janvye a. Men gen plizyè nan moun sa yo ki rete alawonyay nan Wachintonn kap tann okazyon pou fè plis lòbèy. Kounye a gen yon gwo kloti ki monte tout arebò Kapitòl la epi yo ranfòse sekirite bilding sa a kote prezidan Joe Biden dwe prete sèman nan 12 jou ankò.

Anpil nan fanatik Trump yo sèvi ak rezo sosyal yo pou mobilize epi planifye zak yo. Prezidan Trump limenm itilize rezo yo anpil pou kominike ak baz li. Men apre gwo dezòd 6 janvye yo, Facebook, Instagram ak Twitter bloke Trump ak plizyè nan fanatik li yo pou anpeche yo kontinye sèvi ak platfòm sa yo pou ankouraje vyolans epi bay manti sou eleksyon 3 novanm 2020 yo.

Kounye a prezidan Trump ak fanatik li yo ap itilize lòt platfòm tankou Parler pou kontinye kominike epi planifye lòt briganday.

Jonel Juste

Author: jjuste02

Journalist, Communication Specialist, Social Media Marketer, blogger, writer, etc.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s