“Solèy, Solèy” se premye liv pwezi Jonel Juste pibliye an Kreyòl, lang li pi renmen an. Se nan lang sa a li ka di sa li vreman santi anndan kè l ; se ladan l li ka kominike tout emosyon l ak pasyon l pou pwezi, lanmou, peyi l, lavi elatriye. Nou espere lap ka fè w viv menm emosyon sa yo tou. Liv sa a disponib sou Amazon. Men kèk moso ladan l.
I
Solèy la leve dèyè mòn nan
Li baye l detire
Li pouse dra lafimen bwouya
Ak lawouze dimaten
Epi l plonje nan de bra m
Toutouni
Jan Pè Letènèl te fè l
Solèy la leve yon bon maten
Li antre san frape
M pa konn kote l pase
L antre nan fenèt kwen je m
Li satouyèt mwen fè m pantan
Reveye m nan dòmi
Limyè solèy la antre toutouni nan chanm mwen
Li parèt kou yon aparisyon
Solèy … Solèy
M tèlman renmen w
M pa ka gade w nan je.
II
Mwenmenm ki te bliye reve
Depi m fin wèw cheri
Tout rèv mwen reveye
Mwenmenm ki te bliye reve
Epi ou vin rive
Si w konn bato echwe
Je m plen ak sab lanmè
Depi m fin wè w amou
Nuit mwen pran depale
Tout zetwal ret bouch be
Ou antre nan nuit mwen
Ou trennen vag lanmè
Bato boutèy solèy
Zèl papiyon kim lanmè
Lanbi ak koki tout koulè
Jonel Juste
Liv la disponib sou Amazon
jonelblog 